بۆچوونەکانی سۆرێن کیەرکێگۆر سەبارەت بە ئەوینێکی ڕاستەقینە

خاڵە سەرەکییەکان:

• سۆرێن کیەرکێگۆر داوا لە خەڵک دەکات وەکوو ئەرکێک سەیری خۆشەویستی بکەن نەک بەس وەکوو هەستێکی ساکار
• وەکوو ئەرکێک بڕوانیتە خۆشەویستی وا دەکات ئەوین بەرانبەر گۆڕانکارییەکان سەقامگیرتر و خۆڕاگرتر بێت و بەهێزتر دەبێت
• ئەو ڕوانینە سەبارەت بە خۆشەویستی کە خۆشت بوێت هەر بەو جۆرەی کە خۆشیان دەوێی پێویستی بە گۆڕانکاری و پێداچوونەوەیە

“دەبێت خۆشەویستی بکەیت.”

ئەم ڕستە کورتەی کیەرکێگۆر، فەیلەسۆفێکی دانیمارکی سەدەی نۆزدە، دەرفەتێکی بەربڵاو بۆ بیرکردنەوە دەخاتە بەردەستمان. هەرچەند کیەرکێگۆر لەسەر بنەمای مەسیحییەت سەبارەت بە خۆشەویستی دەدوێت بەڵام بۆ سوودوەرگرتن لە بۆچوونەکانی پێویست ناکات لەگەڵ ئایینەکەی هاوڕا بیت و بەدەر لە بیروبۆچوونە ئایینییەکەشی دەتوانیت لە هەندێک لە بۆچوونەکانی سەبارەت بە سرووشتی ئەوین سوودێکی زۆر وەربگریت.
وەکوو خۆی داوا لە خوێنەرەکانی دەکات و دەڵێت:

بۆ ماوەیەک مەسیحییەت لەبیر بکە و بیر لەو شتە بکەوە کە وەکوو ئەوین دەیناسیت، بیر لەو شتانە بکەوە کە لە شیعری شاعیراندا دەیانخوێنیتەوە، ئەو شتانەی خۆت لێیان تێدەگەیت، ئینجا سەیر کە و بزانە تا ئێستا بیرت لەمە کردووەتەوە: دەبێت خۆشەویستی بکەیت.

ئەمڕۆکەش هێشتا شاعیران لە ئەوین دەکۆڵنەوە. کەسانی دیکەش هەروا لە زۆر ڕوانگەوە وەکوو شاعیران دەکەن و لە مانای خۆشەویستی ڕادەمێنن. سەرنج بدەنە ئەو گۆرانییە سۆزدارانەی کە گوێیان دەدەنێ، چیرۆکە ئەڤیندارییەکان، فیلم و شانۆ و هتد. هەموو ئەو چیرۆکانەی لەنێو کتێبەکان و سەر شاشەکان دەیانخوێننەوە و سەیریان دەکەن، ئەوانیش وەکوو شاعیران سەبارەت بە ئەوین جەخت لەسەر ئەو ڕوانگەیە دەکەنەوە کە خۆشەویستی شتێکە ئەزموون دەکرێت نەک شتێک کە هەڵبژێردرێت. زۆربەی جار خۆشەویستییەکان سەرنجیان لەسەر هەستی ئەویندارەکانە، ئەوەی کە چ هەستێک لە یەکدیدا دەچێنن، بێگومان ئەمە شتێکی چاکە بەڵام لە لای کیەرکێگۆر ئەوین زۆر لەمە بەربڵاوترە.

تەنیا کاتێک خۆشەویستی وەکوو ئەرک وەربگیرێت، تەنیا ئەو کاتەیە کە خۆشەویستی پارێزراو دەبێت بەرانبەر گۆڕانکارییەکان، بۆ هەتاهەتایە ئازاد دەبێت بە سەربەخۆییەکی مەزنەوە، بۆ هەتاهەتایە  دڵشاد و پارێزراو دەبێت بەرانبەر بێهیوایی.

بۆچی وایە؟

چونکە ئێمە دگۆڕین، خۆشەویستەکانمان دەگۆڕن، هەستەکانمان تووشی گۆڕان دەبن. خۆشەویستی شاعیران کراوەن بەرانبەر ئەم گۆڕانکارییانە. بەڵام بۆ کیەرکێگۆر کاتێک ئێمە خۆشویستنی یەکتری وەکوو ئەرکێک وەربگرین و بە ئەرکی بزانین ئیدی بەرانبەر ئەم گۆڕانکارییانە پارێزراو دەبێت. کاتێک وەکوو ئەرک بڕوانینە خۆشەویستی ئیتر ئەوین ئەوە نییە کە خۆشت بوێت بەس چونکە خۆشیان دەوێی، بەڵکوو دەبێت بە خۆشویستنێکی پەتی. لە ئەستۆگرتنە کە خۆشەویستییەکە سەقامگیر دەکات نەک پێچەوانەکەی.

خەڵک بەرەو چاکە یان خراپە دەگۆڕن، ئەگەر خۆشەویستی بەس لەسەر هەست و ئەوە بێت کە کەسی بەرانبەر چ هەستێکم تێدا درووست دەکات، زۆر لاواز دەبێت. هیچ ئەوینێکی مرۆڤ نەبەز و تەواو پارێزراو نییە، بەڵام دەتوانین بەهێزتری بکەینەوە. دەتوانین خۆشەویستیمان بۆ کەسانی دی چڕتر و بەهێزتر بکەین ئەگەر بە بڕیاری خۆمان وەکوو ئەرکێک لە ئەستۆی بگرین و بە ئەرکی بزانین کە خۆشمان بوێن، گرینگییان پێ بدەین، ئاگاداریان بین و چاکەیان دەرحەق بکەین.

دواجار هاوڕای کیەرکێگۆر بن یان نا بۆچوونەکانی سەبارەت بە ئەوین جێگای سەرنج و تێڕامانن چونکە زۆربەی ڕوانیینەکانمان سەبارەت بە خۆشەویستی دەخەنە خانەی پرسیار و کێشمەکێشەوە. بۆچوونگەلێک کە پێویستیان بە کۆڵینەوە و تێڕامانە.